சுகாதார அமைச்சின் நிர்வாக செயற்பாட்டில் பாரிய அரசியல் தாக்கங்கள் காணப்படுவதாக அரச வைத்திய அதிகாரிகள் சங்கம் தெரிவிப்பு

சுகாதார அமைச்சின் நிர்வாக செயற்பாட்டில் பாரிய அரசியல் தாக்கங்கள் காணப்படுவதாக அரச வைத்திய அதிகாரிகள் சங்கம் தெரிவித்துள்ளது.

இதனை உடனடியாகச் சீர்செய்ய சுகாதார அமைச்சர் நடவடிக்கை எடுக்காவிட்டால், கடும் நடவடிக்கை எடுக்கத் தயார் என சங்கத்தின் செயலாளர் வைத்தியர் பிரபாத் சுகததாச விடுத்துள்ள அறிக்கையில் தெரிவித்துள்ளார்.

அந்த அறிக்கையில் மேலும் தெரிவிக்கப்பட்டுள்தாவது-

சமீப காலமாக, பல்வேறு தரப்பினரால் சட்டவிரோதமான முறையில் மருத்துவப் பரிமாற்றச் செயல்பாட்டில் தேவையற்ற செல்வாக்கு மற்றும் தலையீடுகளின் பாதகமான போக்கு காணப்படுகின்றது.

சுகாதார அமைச்சின் சில அதிகாரிகள் தற்போது நடைமுறையில் உள்ள சட்ட முறைமைகளை மீறிச் செயற்படும் முயற்சியினால் 2025 ஆம் ஆண்டுக்கான வருடாந்த இடமாற்றப் பட்டியலை வெளியிடுவதில் பல மாதங்களாக தாமதம் ஏற்பட்டுள்ளது.

அநீதி இழைக்கப்பட்ட வைத்தியர்களின் எண்ணிக்கை 5000க்கும் மேலாகும்.

வைத்தியர்களின் தற்காலிகப் பணியிடங்கள் இடமாற்ற சபையின் ஒப்புதலுக்கு உட்பட்டதாக இருக்கவேண்டும்.

இதன் மூலம் செயற்பாட்டில் நேர்மை, வெளிப்படைத்தன்மை மற்றும் துல்லியத்தை உறுதி செய்ய வேண்டும்.

இதேவேளை நிபுணத்துவ வைத்தியர்களின் இடமாற்றம் தொடர்பில் முன்னெப்போதும் இல்லாத வகையில் இடையூறுகள் ஏற்பட்டுள்ளமை அண்மைக் கால நிகழ்வுகளின் ஊடாக அவதானிக்கப்பட்டுள்ளது.

சுகாதார அமைச்சிலும் சுகாதாரத்துறையிலும் அரசியல் சார்புகளும் நிகழ்ச்சி நிரல்களும் முதன்மை பெறுகின்ற சூழ் நிலையில், கடந்த காலத்தில் கட்டியெழுப்பப்பட்ட நம்பிக்கையான சூழலுக்கு சேதம் விளைவித்து சுகாதார அமைப்பை மீண்டும் நெருக்கடிக்கு கொண்டு செல்வதற்கான பின்னணி தயாராகி வருகிறது.

இதன் மூலம் அப்பாவி நோயாளிகளின் உயிருக்கு ஆபத்து ஏற்படும்.

இந்நாட்டு மக்களின் வாழ்வு உரிமையைப் பாதுகாப்பது ஜனாதிபதி, சுகாதார அமைச்சர் மற்றும் ஏனைய பொறுப்புள்ள நபர்களின் தவிர்க்க முடியாத பொறுப்பாகும் - என்றுள்ளது.