அரச ஊழியர்களின் சம்பளத்தை உயர்த்த ரூ. 30 ஆயிரம் கோடி மேலதிகமாக தேவை!

அரச சேவையாளர்களுக்கு மீண்டும் சம்பளத்தை அதிகரிக்க வேண்டுமாயின், வருடாந்தம் 30 ஆயிரம் கோடி ரூபாயை மேலதிகமாக ஒதுக்க வேண்டும். நாணயம் அச்சிடாமல் சம்பளத்தை அதிகரிப்பதாயின் வற் வரியை 22 சதவீதத்தாலும், நிறுவன வரியை 42 சதவீதத்தாலும் அதிகரிக்க வேண்டும். இதற்கு நாட்டு மக்கள் இணக்கம் தெரிவிப்பார்களா? இவ்வாறு கேள்வி எழுப்பியுள்ளார் நிதி இராஜாங்க அமைச்சர் செஹான் சேமசிங்க.

பாராளுமன்றத்தில் நேற்று புதன் கிழமை நடைபெற்ற மது வரி கட்ட ளைச் சட்டம் மற்றும் ஏற்றுமதி, இறக்கு மதி கட்டுப்பாட்டுச் சட்டங்கள் குறித்த வர்த்தமானி அறிவித்தல்கள் தொடர்பான விவாதத்தில் உரையாற்றும்போது மேற்கண்டவாறு குறிப்பிட்டார். அவர் மேலும் உரையாற்றியதாவது,

பொருளாதார நெருக்கடிக்கு தீர்வு ஒப்பீட்டளவில் தீர்வு கண்டுள்ள நிலையில் பொருளாதாரம் மீட்சிப் பெறவில்லை என்று குறிப்பிடுபவர்களின் உளவியலை ஆராய வேண்டும். தேசிய கடன் மறுசீரமைக்கும் போது ஊழியர் சேமலாப நிதியத்துக்கும், இதர நிதியங்களுக்கும் பாதிப்பு ஏற்படும் என்பதை ஆரம்பத்தில் குறிப்பிட்டோம். பாரிய நெருக்கடிகளுக்கு மத்தியில் தேசிய கடன் மறுசீரமைக்கப்பட்டது.

பொருளாதார நெருக்கடியில் இருந்து மீட்சிப் பெற்றதன் பின்னர் ஊழியர் சேமலாப நிதியத்துக்கான வட்டி வழங்கலை 12 அல்லது 13 சதவீதத்தால் அதிகரிக்க அரசாங்கம் கொள்கை ரீதியில் தீர்மானித்தது. ஆகவே பொருளாதார விவகாரத்தில் நாட்டு மக்களை தவறாக வழிநடத்துவதை எதிர்க்கட்சியினர் தவிர்த்துக் கொள்ள வேண்டும்.

நாடு வங்குரோத்து நிலையடைந்த தன் பின்னர் உலக நாடுகள் அனைத்தும் இலங்கைக்கு ஒத்துழைப்பு வழங்கின. ஆனால், துரதிர்ஷ்டவசமான எதிர்க்கட்சிகள் ஒத்துழைப்பு வழங்கவில்லை. குறுகிய அரசியல் நோக்கங்களுக்காக குற்றச்சாட்டுக்களை மாத்திரமே முன் வைத்தனர். குறுகிய காலத்தில் இலங்கை பொருளாதார நெருக்கடியில் இருந்து மீட்சிப் பெற்றுள்ளது என சர்வதேசம் குறிப்பிட்டுள்ளமை நாட்டின் நிதி நிலைபேறான தன்மையை உறுதிப் படுத்தியுள்ளது.

சர்வதேச கடன் மறுசீரமைப்பு தொடர்பில் இணக்கமான தீர்மானம் எடுக்கப்பட்டுள்ளது. இருதரப்பு மற்றும் வணிக கடன் வழங்குநர்களுடன் இறுதி இணக்கப்பாடு எட்டப்பட்டவுடன் சகல ஆவணங்களும் பாராளுமன்றத்துக்கு சமர்ப்பிக்கப்படும். கடன் மறுசீரமைப்பு விவகாரத்தில் நாட்டு மக்களுக்கு எதனையும் நாங்கள் மறைக்கவில்லை. வெளிப்படையாக செயற்பட்டுள்ளோம். என்றார்