மட்டக்களப்பில் வயலுக்குள் நின்றவர்கள் மழை, வெள்ளத்தால் வீடு திரும்ப முடியாமல் சிக்கித் தவிக்கும் விவசாயிகள்

மட்டக்களப்பு - புல்லுமலை, தம்பட்டி மற்றும் மாவடி ஓடை வண்ணாத்தி ஆறு பகுதிகளில் உள்ள வயல்களில் வேளாண்மை நடவடிக்கைக்குச் சென்ற 7 விவசாயிகள் அந்தப் பகுதிகளில் ஏற்பட்ட வெள்ளத்தால் அங்கிருந்து வெளியேறி வீடு திரும்ப முடியாமல் சிக்குண்டுள்ளனர் என்று மாவட்ட விவசாய அமைப்பின் தலைவர் ரமேஸ் தெரிவித்தார்.

குறித்த பகுதியிலுள்ள வயல்களில் காவலுக்கு சென்ற மற்றும் வேளாண்மை நடவடிக்கைகளுக்காக புல்லுமலை தம்பட்டி வயல் பிரதேசத்தில் 3 விவசாயிகளும் மாவடி ஓடை வண்ணாத்தி ஆறு வயல் பிரதேசத்தில் 4 பேர் உட்பட 7 விவசாயிகள் சென்றிருந்தனர்.

இந்த நிலையில் தொடர் கடும் மழை காரணமாக அந்த பகுதியிலுள்ள குளங்களின் வான்கதவுகள் திறக்கப்பட்டதையடுத்து வயல் நிலங்கள் வெள்ளத்தில் முழ்கியதுடன் வீதிகள் பல மூழ்கியதையடுத்து அந்த விவசாயிகள் தமது வாடிகளில் இருந்து வீடுகளுக்கு வர முடியாமல் சிக்குண்டுள்ளனர்.

இவர்களை மீட்பதற்காக கடற்படையினர் மற்றும் விமானப் படையினரின் உதவியை நாடியுள்ளதாகவும் வெள்ள நீர் அதிகமாக பாய்ந்தோடுவதால் படகில் செல்ல முடியாத சூழல் ஏற்பட்டுள்ளதாகவும் மேகம் இருள் சூழ்ந்து கடும் காற்று வீசுவதால் விமானப்படையின் ஹெலிகொப்டர் பயணிக்க முடியாத நிலை ஏற்பட்டுள்ளதாக விமானப் படையினர் தெரிவித்தனர்.