முல்லைத்தீவு, புதுக்குடியிருப்பில் பாடசாலை மாணவியை வைத்து பாலியல் தொழில் நடத்தி வந்த குற்றச்சாட்டில் பெண் ஒருவரும் அவரது கணவரும் கைது

முல்லைத்தீவு, புதுக்குடியிருப்புப் பகுதியில் பாடசாலை மாணவி ஒருவரை வைத்து பாலியல் தொழில் நடத்தி வந்த குற்றச்சாட்டில் குடும்பப் பெண் ஒருவரும், அவரது கணவரும் நேற்று ஞாயிற்றுக்கிழமை கைது செய்யப்பட்டுள்ளனர்.

கிளிநொச்சியைச் சேர்ந்த 14 வயது மாணவி ஒருவர் புதுக்குடியிருப்பு, கோம்பாவில் பகுதியில் மூன்று மாதங்களாகத் தங்கவைக்கப்பட்டு விபச்சாரத் தொழிலில் ஈடுபடுத்தப்பட்டு வந்துள்ளார்.

பின்னர் அவர் கிளிநொச்சியில் உள்ள தனது வீட்டுக்குச் சென்றுள்ளார்.

மேற்படி மாணவியின் உடலில் ஏற்பட்ட மாற்றத்தை அவதானித்த பெற்றோர் கிளிநொச்சி வைத்தியசாலையில் சேர்த்த பின்னர் அவர் பாலியல் துன்புறுத்தலுக்கு உள்ளாகியிருந்தமை தெரியவந்துள்ளது.

இதனையடுத்து கிளிநொச்சி வைத்தியசாலை பொலிஸார் பாதிக்கப்பட்ட மாணவியிடம் விசாரணை செய்த போது அவருக்கும் கிளிநொச்சியில் ஒரு பெண்ணுக்கும் பழக்கம் ஏற்பட்டுள்ளது.

பின்னர் அந்தப் பெண் மூலமாக புதுக்குடியிருப்புப் பெண்ணுக்கும் மேற்படி மாணவிக்கும் தொடர்பு ஏற்பட்டுள்ளது.

மாணவிக்குப் பண ஆசையைக் காட்டி அவரைப் புதுக்குடியிருப்பு, கோம்பாவில் பகுதியில் உள்ள பெண் வீட்டுக்கு அழைத்துள்ளனர்.

அங்கு மூன்று மாதங்கள் மேற்படி மாணவி தங்கியிருந்துள்ளார்.

மாணவியை வைத்து விபச்சாரத் தொழில் செய்து பணத்தை அவருக்குக் கொடுக்க மறுத்ததைத் தொடர்ந்தே அவர் வீட்டை விட்டு வெளியேறிச் சென்றுள்ளார்.

பின்னர் கிளிநொச்சி பொலிஸாரினால் கிளிநொச்சியில் ஒரு பெண் கைது செய்யப்பட்டுள்ளார்.

அதனைத் தொடர்ந்து புதுக்குடியிருப்புப் பொலிஸாருக்குத் தகவல் வழங்கப்பட்டதைத் தொடர்ந்து புதுக்குடியிருப்பு குடும்பப் பெண்ணும் கணவரும் கைது செய்யப்பட்டுள்ளனர்.

இது தொடர்பான மேலதிக விசாரணைகளைப் புதுகுடியிருப்பு மற்றும் கிளிநொச்சி பொலிஸார் இணைந்து மேற்கொண்டு வருகின்றனர்.