யாழ். நகரில் பொலிஸார் மீது தாக்குதல்: நான்கு இளைஞர்கள் கைது!

யாழ்ப்பாணம் பிரதான பேருந்து நிலையத்தில் பொலிஸார் மீது தாக்குதல் நடத்தியமை உள்ளிட்ட குற்றச்சாட்டுகளில் திருகோணமலையைச் சேர்ந்த நான்கு இளைஞர்கள் கைது செய்யப்பட்டுள்ளனர். 

யாழ்ப்பாணம் பிரதான பேருந்து நிலையத்தில் நேற்று முன்தினம் செவ்வாய்க்கிழமை இரவு இளைஞர்கள் குழுவொன்று அமைதியின்மையை ஏற்படுத்துவதாக யாழ்ப்பாணம் பொலிஸாருக்குத் தகவல் வழங்கப்பட்டது.

இதன்பிரகாரம் பேருந்து நிலையத் துக்கு விரைந்து சென்ற பொலிஸ் குழு அங்கு அமைதியின்மையை ஏற்படுத்திய குற்றச்சாட்டில் நான்கு இளைஞர்களைக் கைதுசெய்ய முயற்சித்த போது இளைஞர்கள் பொலிஸார் மீது தாக்குதல் மேற்கொண்டுள்ளனர். தாக்குதலில் இரு பொலிஸார் காயமடைந்த நிலையில் யாழ்ப்பாணம் போதனா மருத்துவமனையில் சிகிச்சைக்காக சேர்க்கப்பட்டனர்.

இதையடுத்து, பொலிஸார் மீது தாக்குதல் நடத்தியமை, கடமைக்கு இடையூறு விளைத்தமை, பொதுவிடத்தில் அமைதியின்மையை ஏற்படுத்தியமை உள்ளிட்ட குற்றச்சாட்டுக்களில் மேற்படி நான்கு இளைஞர்களும் கைது செய்யப்பட்டுள்ளனர்.

கைதான நான்கு இளைஞர்களும் திருகோணமலையைச் சேர்ந்தவர்கள் எனவும், நால்வரையும் பொலிஸ் நிலையத்தில் தடுத்து வைத்து 

விசாரணைகளை முன்னெடுத்து வருவதாகவும் யாழ்ப்பாணம் பொலிஸார் தெரிவித்தனர்.