யாழ்ப்பாணத்தில் செயற்பட்ட ஆவா கும்பலின் தலைவன் கனடாவில் கைது

யாழ்ப்பாணத்தில் செயற்பட்ட ஆவா கும்பலின் தலைவன் என கூறப்படும் ஒருவர் கனடாவில் கைது செய்யப்பட்டுள்ளார்.

அஜந்தன் சுப்ரமணியம் என அழைக்கப்படும் பிரசன்ன நல்லலிங்கம் என்ற 32 வயதுடைய நபரே இவ்வாறு கைது செய்யப்பட்டுள்ளதாக கனேடிய ஊடகங்கள் செய்தி வெளியிட்டுள்ளன.

2022ஆம் ஆண்டு பிரான்ஸில் இடம்பெற்ற கொலைச் சம்பவம் தொடர்பில் தேடப்பட்டு வரும் இவர், இலங்கையிலும் பல கொலைகளுடன் தொடர்புடையவர் எனத் தெரிவிக்கப்படுகிறது.

இதன்படி, சந்தேகநபரை கைது செய்ய இலங்கையின் பாதுகாப்புப் படையினர் சர்வதேச பிடியாணை பிறப்பித்துள்ளதாக தெரிவிக்கப்பட்டுள்ளது.

2021ஆம் ஆண்டுக்குப் பின்னர் இலங்கையிலிருந்து தப்பிச் சென்ற இவர், அமெரிக்கா மற்றும் பிரான்ஸ் ஆகிய நாடுகளில் இருந்து கனடாவுக்கு வந்த போது கனேடிய பாதுகாப்புப் படையினரால் கைது செய்யப்பட்டுள்ளார்.

சந்தேகநபரான குறித்த இலங்கையர் மேலதிக விசாரணைகளுக்காக பிரான்ஸ் பாதுகாப்பு படையினரிடம் ஒப்படைக்கப்படவுள்ளதாக கனேடிய பாதுகாப்பு தரப்பினர் அறிவித்துள்ளனர்.

நல்லலிங்கம் இலங்கை மற்றும் பிரான்ஸ் அதிகாரிகளிடம் இருந்து தப்பி ஓடிய நிலையில் இந்த வருட தொடக்கத்தில் கனடாவின் டொரன்டோவில் கைது செய்யப்பட்டார்.

அஜந்தன் சுப்ரமணியம் என்ற பெயரைப் பயன்படுத்தும் நல்லலிங்கம், 2022 செப்டம்பர் இல் பரிஸின் புறநகர்ப் பகுதியான லா கோர்னியூவில் வன்முறைத் தாக்குதலில் ஈடுபட்டார் என்று பிரெஞ்சு அதிகாரிகள் தெரிவித்தனர். 

இக்குழுவின் எதிரிக் குழுவான எல்.சி. பாய்ஸ் (LC Boys) என்ற குழுவைச் சேர்ந்த கும்பலை குறிவைத்து நடத்தப்பட்ட தாக்குதலில், அபிராமன் பாலகிருஷ்ணன் என்ற ஒருவர் உயிரிழந்ததுடன், மற்றொருவர் படுகாயமடைந்தார். 

கத்திகள் மற்றும் ஆயுதம் ஏந்தியவர்கள் தாக்குதலில் ஈடுபட்டதுடன் நல்லலிங்கம் தான் இந்தத் தாக்குதலைத் திட்டமிட்டு வழிநடத்தியதாக நீதிமன்ற ஆவணங்கள் காட்டுகின்றன.

சம்பவத்தின் போது, ​​நல்லலிங்கம் ஏற்கனவே 2021 ஆம் ஆண்டு சிவகுமாரன் ஜீவரத்னாவை கொலை செய்ததற்காக இலங்கையில் தேடப்பட்டு வந்தார். 

அவர் நாட்டை விட்டு தப்பிச் சென்றதால், இன்டர்போல் ஒரு சர்வதேச பிடியாணையைப் பிறப்பிக்க வழி செய்தது.

2021 இல் பரிஸ் உணவகம் ஒன்றில் ஒழுங்கமைக்கப்பட்ட குற்றச்செயலில் பங்கு வகித்ததற்காக மூன்றாண்டு சிறைத்தண்டனை விதிக்கப்பட்டதுடன் நல்லலிங்கம் பிரான்சிலும் குற்றஞ்சாட்டப்பட்ட வரலாற்றையும் கொண்டிருந்தார்.

கியூபெக்கில் உள்ள எல்லைக் கடவையில் போலி அடையாளத்தைப் பயன்படுத்தி நல்லலிங்கம் 2022 டிசம்பரில் கனடாவிற்குள் சட்டவிரோதமாக நுழைந்தார் எனக் கூறப்படுகிறது. 

அகதிகள் அனுமதி விசாரணைக்காக அவர் ஒரு வருடத்திற்கும் மேலாக கனடாவில் தங்கியிருந்தார். விசாரணைக்கு அவர் முன்னிலையாகாததால், அதிகாரிகள் அவரை 2024 மே மாதம் கைது செய்தனர்.

அவரது கைரேகைகள் இன்டர்போலின் கோப்பில் உள்ள பதிவுகளுடன் பொருந்தியமையானது, அவரை அடையாளம் காண வழிவகுத்தது.

ஒழுங்கமைக்கப்பட்ட சட்டவிரோத நடவடிக்கைகளில் ஈடுபட்டது மற்றும் முந்தைய குற்றவியல் வரலாறு உள்ளிட்ட குற்றச்சாட்டுகளின் தீவிரத்தை மேற்கோள் காட்டி, பிரெஞ்சு அதிகாரிகள் அவரை ஒப்படைக்குமாறு உத்தியோகபூர்வமாக கோரியுள்ளனர்.

நல்லலிங்கம் தற்போது கனடாவில் பொலிஸ் காவலில் உள்ளார், அவரை நாடுகடத்துவதற்கான விசாரணை மே 2025 இல் திட்டமிடப்பட்டுள்ளது.